ဒီတစ်လပြီးရင် ပြန်ခဲ့မယ်ဆိုပေမယ့်
ရောက်မသွားဖြစ်ပြန်ဘူး
တက်တက်လာနေတဲ့ ဒဏ်ရာတွေကို
အဖော်လုပ်ပြီး ဆေးလိပ်နဲ့
မြည်းနေတယ်
ကလေးရေ
တစ်ခါတစ်ရံဆိုတာတွေက သိပ်ကိုကြာတတ်တယ်
ကန့်လန့်ဖြတ်လမ်းပေါ်က အနာတရတွေကို
သယ်ပိုးရင်း
စိတ်ကြိုးတွေက ငါ့ဆီကို လွင့်နေပြီလား
ဒီမှာ မင်းကမ်းပေးနေကျ စီးကရက်တွေက
အရင်လို ငါ့ကို မချိုမြိန်စေဘူး
အခွင့်ကြုံရင် ဖွင့်ထားတဲ့
တံခါးကို
အလင်းတွေနဲ့ လာခေါက်မယ်
ပညတ်ထားတာတွေ ရှိလဲ ရှိပါစေပေါ့
တို့ရဲ့ တရားကို တို့အောင်နိုင်တယ်
တို့ရဲ့ ကြမ္မာကို တို့ဖန်တီးနိုင်တယ်
အဆင်မပြေမှုတွေက ဘယ်တော့မှ
အသားမကျဘူး
ဒီတစ်ခါပြန်လာရင် မင်းဧရာဆိပ်ခံတံတားပေါ်မှာ
ညလုံးပေါက် ဂစ်တာထိုင်တီးရင်း မင်းကို အားပါးတရကြည့်မယ်
မင်းနွှဲခဲ့သမျှ တိုက်ပွဲတွေကို
စီးကရက်ဖွာရင်း နားထောင်မယ်
စိတ်ဆင်သမျှ အတွေးတွေကတော့
မင်းဆီမှာချည်းပဲ
ဒဏ်ရာတစ်ခါရတိုင်း ဘုရားမှာ
တစ်ခါဆုတောင်းတုန်းပဲလား
လူအဖြစ်ကို သေးသိမ် နိမ့်ကျစေတဲ့
အပြုအမူတွေကို မလုပ်နဲ့ကွယ်
တို့တွေဟာ လူသားတွေဖြစ်တယ်
ဘယ် ဘာသာရေးကမှ တို့ကို လာမကယ်နိုင်ပါဘူး
ကလေးရဲ့
ဒုက္ခတွေ ပင်လယ်လိုဝေနေတတ်တဲ့
မင်းတစ်ယောက်
မခေါ်ပဲရောက်ရောက်လာတတ်တဲ့
အမှားတွေအတွက်
မြင်မြင်သမျှကို တိုက်ခိုက်မပစ်လိုက်ပါနဲ့
လူတွေအကုန်လုံးက
မီးကို
ရှာဖွေမတွေ့ရှိခင်တည်းက ဒုက္ခတွေအတိနဲ့ ပဲ
တို့တတွေရဲ့
အမှားတွေဟာ အမှန်တွေလည်းဖြစ်နေရဲ့
ရင်ကိုဖွင့်
မျက်စိကိုဖွင့် ရင်ဆိုင်ကြစို့လေ
ငါတို့တွေ
အဓိက ယုံကြည်ရမှာက
ကဗျာတွေဟာ
ထာဝရကို ဖြစ်ပေါ်စေတယ်ဆိုတာပဲ ကလေးရေ
လင်းချင်းရာလင်း
ထင်းချင်းရာထင်းကြပါစေ
တို့ရဲ့
အဆင်းကို တို့ကြေနပ်စို့ရဲ့
ငြင်းချင်သူတွေလည်း
ငြင်းကြပါစေ
သေချာတာက
ဒီလို
လဲ့ဖြာမှုမျိုးတွေနဲ့ဆို
တို့သမိုင်းဟာ
မွှေးမြနေမှာပါပဲ
ကလေးရေ
မင်းအတွက်
အနာဂါတ်ဟာ ခုချိန်ပဲ
ပြန်ဆုံကြမယ့်အချိန်တွေ
ဝေ့၀ိုက်လာမှာ အသေအချာပဲ
ပတ်ဝန်းကျင်ဆိုတာ
ဖြေဆေးနဲ့အဆိပ် တပူးတတွဲအမြဲရှိတယ်
လူလိုသူလိုအမှားတွေနဲ့
လူတွေကြားတွေ ရဲရဲမှားနိုင်ပါစေ…
ရဲရဲမှားနိုင်ပါစေ…က…လေး…ရေ။ ။
ရွှေ ကြယ် မိုး
No comments:
Post a Comment